هو فيه حدّ بينسى _ فارس محمد
هو فيه حدّ بينسى
قالوا الزمن بينسّي…
وأنا لسه واقف في نفس المكان
بنفس الجرح القديم
بنفس السؤال اللي ما اتردّش عليه
هو فيه حبّ…
يموت كده من غير ما يودّع؟
ولا إحنا اللي
ودّعنا نفسنا وإحنا مش واخدين بالنا؟
كنت فاكر إنك لما تمشي
هتسيب في قلبي أثر عابر
لقيتك سبت كلّي
وسبتني أنا… واقف أقاوم الذاكرة
كل حاجة بعدك
بقت شبهك… ومش إنت
حتى الضحكة
بقت بتتكسف مني
يوه…
هو فيه حدّ
يخبّي وجعه ويعيش؟
هو فيه حدّ
يستحمل غيابك كأنه عادي؟
أنا كل ما أقول نسيت
النسيان يفتكرني بيك
ويرجعني لأول مرة
قولتلي فيها
أنا ليك
سابتني الأيام فيك
مش قادر أطلع منك
حتى الشوارع اللي مشيناها
بقت تمشي ورايا
وكل أغنية قديمة
تفتح فيّا بابك
وأرجع طفل
واقف على باب الوجع
لو الزمن بينسّي…
يبقى أنا خارج حسابه
أنا واحد
النسيان ما يعرفش طريقه
أنا مش زعلان عليك…
أنا زعلان مني
إني صدّقت إن الحب
ممكن يوم ينسحب كده بسهولة
بقلمي
فارس محمد
شعر فارس محمد
اضف تعليقاً عبر:
الابتسامات